Verkætlanir
Pollution
Eg eri í løtuni í gongd við eina verkætlan um polllution/dálking. Eg havi valt at tikið portrett myndir uttanfyri við vátum plastikki og følskum blómum. Hetta er ein myndarøð sum eg enn arbeiði við og ætlanin er at prenta myndirnar við cyanotype fyri at royna nakað nýtt og eisini umhvørvisvinarligt.
Vónbrot
Seyðarhøvdið hyggur at mær
við ísakøldum eygnabrá
eins og var tað eg
sum segði tí
at tey við vápnum vignu
fara til Valhallar
Tú ert tað sum tú etur (II)
Eg eri ikki 70% vatn
eg eri 95% olja
Fiskurin er ikki fiskur
hann er oljan sum dró hann upp á land
Kornið er ikki korn
tað er oljan sum sáddi og oljan í treskimaskinuni
og ojan sum flutti tað til mín
Neytið er ikki neyt
tað er tjúgu tunnur av olju
Eg eri Saudiarabia, eg eri Barentshavið
eg eri oyðimørkin í Irak og Libya
eg eri Texas
Tú ert tað sum tú etur
eg eri ein trøllakampafløta á Pangeu
eg eri ein flogedla, eg eri tyrannosaurus rex
Við køldum blóði traðki eg spitaran í botn
Homo consumus
Menniskjans frumkensla
var ikki veiðukenslan
Í fyrstuni
fyri spótsins
og vápnsins dagar
reikaðu menniskju um fløturnar
og savnaðu!
Tey savnaðu røtur
og tey savnaðu fruktir
og egg og nýdeyð djór
Eg
nútíðarmenniskjað
skíggjasjúklingurin
merki hvussu frummenniskjað brýtur fram
tá ið eg strúki avstað við vogninum
og savni og savni og savni...
